Woann Ende Oktober die Beem ehr Laab verlorn häwwe, unn de Wind immer mäiner bleest, doann gäits in de Schbeetherbscht.
Middoags, woann mer vun de Schul hoamkumme sin, hots woas zu Esse gäwwe, unn woann die Schulsache gemoacht warn, häwwe mer Buuwe uns getroffe, zum Rieweboutz-Schnitze.
Doann iss nemlisch die Zeit kumme, wou mer Riewe ausgemoacht hot. Do is mer mit uffs Feld unn hot geholfe.
Mim Bulldog unn‘eme Ouhenger hinne drou is mer nauß uffs Feld gefahn. Mer Buuwe häwwe hinne uff em Henger mitfahrn derfe. Mim Bulldog unn mire Rieweausmach-Maschin sin die Riewe aus em Boore geholt worn, unn mer Buuwe häwwe geholfe, die Riewe uff en Ouhenger zu loade.
Doann hot mer die Riewe zum Bauer hoamg‘fahrn unn dort sinse in de Riewekeller noikumme.
Doann isses aa schun in de November noigoange, unn die Dääg sin immer kärzer worn. Do iss mer doann zum Bauer hiegoange un hot g‘froogt, ob mer sisch aus em Riewekeller e schäinie Rieb raussuche derft, weil mer en Rieweboutz mache wollt.
Do hot mer sou e Dickrieb genumme, die wou nedd sou kloa war unn fun de Farb her gebassd hot, also e bissel Rout un e bissel Gääl, sou dass die Rieb schäi leischte koann.
Dehoam hot mer erscht mim Daschemesser orrer mit`eme Dolsch dere Dickrieb owwe en Deckel oabg‘schnerre, unn doann isses oans Aushehle goange.
Dodebei hot mer mit`eme Kischemesser unn mit eme Subbeleffel die Rieb ausgehehlt. War doann die Rieb souweit ferddisch, isses drougoange, dem Rieweboutz e´Fratz zu schnitze.
Zwaa Aache, e Noas unn e Maul hot mer do neu g‘schnitzt. In die Aache unn ins Maul hot mer doann noch Schdreischhelzer g`schdeggd um den Rieweboutz noch gruselischer zu mache.
In den Rieweboutz hot mer doann noch e Kerz noi g’schdellt, unn mer hots nedd oabwaade kenne, bis es dunkel worn is, unn mer den Rieweboutz ouschdegge gederft hot.
Die Rieweboutze sin doann souloang oug‘schdeggt worn, bis se runzlisch warn. Moanschemol hot aa en Windschdouß die Kerz in dem Rieweboutz umg‘schmesse unn de Rieweboutz is oabgebrennt.
Die Rieweboutze sin doann bis iwwer de Martinsdoag schdäigelosst worn, um die bäise Geischder zu vetreiwe.
Bernd Ginader aus Bonsweiher
Aus unserer Durchblick-Mundart-Ecke!